DÚBIDAS FRECUENTES EN RELACIÓN A ACTIVIDADE EXTRAESCOLAR DE PISCINA DO SEGUINTE CURSO ACADÉMICO

1. A actividade non conta con trasporte escolar, hai que darse de conta do prezo reducido da mesma, e que a maiores do transporte iso implicaría persoal para baixalos e subilos, vestilos e desvestilos e duchalos, algo inviable por 20-23€ o trimestre.
2. Actualmente o prazo está aberto para a inscrición. No vindeiro mes de xuño a dirección da piscina creará o seu calendario de actividades e poderemos saber o número de prazas concedidas , xerando así a lista de admitidos e a lista de espera, nese momento formalizarase a matrícula, co pago da primeira cota e impreso de datos persoais.

Se nese momento o horario e o día non vos é factible con non matricularvos sería suficiente.

3. A Actividade será unha vez a semana cunha duración de 45 min de sesión.
4. Os que actualmente non son socios da ANPA e se fagan socios no vindeiro curso poderán acollerse o pago de importe como socio na segunda e terceira cota trimestral.
5. O fin da actividade é poder facer deporte a un prezo moi reducido, e compartir tempo de lecer fora do centro entre compañeiros.

LEMBRADE, A actual preinscripción non implica matrícula se a data e hora non vos interesa. ¿ anímaste?

ESCOLA DE FAMILIAS DE ABRIL

Un mes máis a Escola de Familias trata un tema de especial interese para a comunidade educativa na actualidade. Desta vez a experta María Chavert impartirá unha charla titulada "Prevención no consumo de drogas nas familias".

A reunión terá lugar hoxe de 20:30-22:00 horas na Casa da Estación de Tren de Santa Cruz de Ribadulla.

Esperamos a vosa presenza e que sexa do voso interese.

IX XORNADAS DA CIENCIA E A TECNOLOXÍA

Hoxe comezan en Vedra as actividades da Semana da Ciencia 2016 que este ano tratarán sobre "A luz e a ciencia" e que durarán ata o próximo domingo día 24 no que terá lugar a Feira da Ciencia (Pavillón Municipal de Vedra) na que os escolares participantes no concurso exporán os seus traballos.

Non faltedes a todas as actividades de grande interese que se van a celebrar estes próximos días e sobre todo non deixedes de participar de forma activa cos vosos fillos e fillas para concienciar a todas as persoas da importancia da luz e a tecnoloxía na cidadanía.

Debaixo destas liñas tedes máis información:

PROGRAMA

BASES

TEATRO ANPA

Mañá ás 12:00 horas na Casa da Terceira Idade de Vedra terá lugar a obra de teatro "Memorias das memorias dun neno labrego" de Candido Pazó, un monólogo escénico-narrativo sobre o libro de Xosé Neira Vilas.

Deste xeito dende esta ANPA intentamos facerlle unha pequena e merecida homenaxe a un dos escritores galegos máis importantes da historia.

A obra foi organizada pola ANPA A Bóca principalmente para os rapaces e rapazas do CPI de Vedra, sen embargo calquera persoa que desexe asistir está totalmente invitada.

ANIMÁDEVOS!

DROGAS E SAÚDE

O departamento de educación do concello de Vedra en colaboración cos centros educativos do municipio está a organizar unhas xornadas sobre prevención de drogodependencia para facilitar os recursos de información, orientación e formación ás familias: “Falemos de drogas” dirixidas a toda a comunidade .

MARÍA TAJES ALONSO

(psiquiatra, xefa de servizo de saúde mental e drogodependencias)

“DROGAS E SAÚDE”

Será o xoves 25 de febreiro, ás 20 h no Centro Municipal de Formación (Casa da Estación do Tren de Santa Cruz de Ribadulla).

Poderán asistir todas as persoas interesadas. Por razóns de organización agradecemos que confirmedes a vosa asistencia no telf. 699041486 Mamen Sabio (Educadora) ou no seguinte enderezo carmen.sabio@vedra.dicoruna.es .

Animádevos a participar. A educación é tarefa de todas e todos.

DEBATE-CONFERENCIA REDE E TECNOLOXÍA: DESAFIOS EDUCATIVOS EN COMUNIDADE

Os vindeiros días venres 19 e sábado 20 terá lugar en Vedra o "VII Seminario-Obradoiro Internacional de Avaliación de Materiais Didácticos" organizado entre outros pola USC e esta ANPA.

O venres pola tarde levaranse a cabo no salón de actos da Casa da Terceira Idade de Vedra unha serie de charlas ás que estades convidadas todas as persoas interesadas en asistir.

Tedes máis información debaixo destas liñas.

NON FALTEDES!!! 

LAV016

Esta fin de semana terá lugar o Laboratorio Audiovisual de Vedra (LAV016) da Asociación Senunpeso que este ano vai pola súa novena edición (9ª Xornadas de Formación e Mostra Audiovisual).

Dende esta ANPA gustaríanos animar a todas as persoas interesadas a asistir á programación en aberto que ofrecen estas Xornadas. A información de dita programación pódese ver debaixo destas liñas.

ANIMÁDEVOS!!!

16º CONCURSO DE PINTURA INFANTIL DA CAMELIA

Un ano máis o Concello de Vedra en colaboración ca Asociación Amigos da Camelia do Val do Ulla organiza o Concurso de Pintura Infantil da Camelia desta vez na súa dezaseisava edición entorno ás XXI Xornadas arredor da camelia. Podedes acceder ás bases do concurso pinchando no enlace debaixo destas liñas.

16º CONCURSO DE PINTURA INFANTIL DA CAMELIA.

O SEMINARIO DE MATERIAIS DIDÁCTICOS NA PRENSA

O pasado martes 19 tivo lugar na Casa do Concello de Vedra a presentación oficial do "VII Seminario-Obradoiro Internacional de Avaliación de Materiais Didácticos" na que estiveron presentes José Viaño (director do CPI de Vedra), Jesús Rodríguez (profesor da USC e coordinador do seminario), Manuel Costa (concelleiro de educación, turismo e medio rural do Concello de Vedra), Carlos Martínez (alcalde de Vedra) e Ramón Lago (membro da ANPA A Boca do CPI de Vedra). 

Como non podía ser doutra maneira ó tratarse dun seminario internacional a prensa rexional incluíu a noticia nas súas páxinas como podedes ver a continuación.

CAMBIO LUGAR ESCOLA DE FAMILIAS

A charla-coloquio de Escola de Familias programada para mañá xoves 21 da xaneiro ás 20 horas cambia de localización e agora terá lugar no Centro Municipal de Formación (Casa da Estación de Tren de Santa Cruz de Ribadulla).

ESCOLA DE FAMILIAS

Nova charla do ciclo Escola de Familias organizado polo Concello de Vedra. Desta vez tratarase o tema "Adolescencia e Relacións Familiares".

Terá lugar na Biblioteca Municipal este xoves 21 de xaneiro de 20:00 a 21:30 horas.

CHARLA-COLOQUÍO DA E.D. VAL DO ULLA

A Escola Deportiva Val do Ulla en colaboración co CPI Plurilingüe de Vedra organiza unha charla-coloquio de grande interese para toda a comunidade educativa e en especial para nais e pais. Os temas a tratar en dita charla son: "Prevención do consumo de drogas no ámbito familiar" e "Adicción ás novas tecnoloxías", dous dos problemas que máis preocupan á comunidade educativa hoxe en día.

Dende a ANPA a Bóca gustaríanos apoiar este tipo de iniciativas e invitar a todas as persoas que estean interesadas a asistir a este tipo de eventos.

ANIMÁDEVOS!!!

VII SEMINARIO-OBRADOIRO INTERNACIONAL DE AVALIACIÓN DE MATERIAIS DIDÁCTICOS

Por segundo ano consecutivo a USC confiou no CPI de Vedra e na ANPA A Bóca para celebrar o "VII Seminario-Obradoiro Internacional de Avaliación de Materiais Didácticos" titulado nesta edición "Rede e Tecnoloxía: Desafíos Educativos en Comunidade".

O seminario terá lugar no CPI de Vedra o fin de semana do 19 e 20 de febreiro deste ano e está enfocado a todas as persoas integrantes da comunidade educativa (profesorado, nais, pais, estudantes...). Aínda que está denominado como internacional impartiranse charlas e obradoiros en castelán e galego.

Debaixo destas liñas tedes toda a información que necesitades para formalizar a matricula e os horarios e temas dos obradoiros:

PROGRAMA

FICHA DE INSCRICIÓN

INSCRICIÓN SOCI@ + SEGURO + ACTIVIDADES 2015-16

A partir de hoxe e ata o domingo 8 de novembro ás 24 horas podes facerte soci@ da ANPA "A BOCA" do CPI de Vedra. Se o desexas tamén podes contratar o Seguro Escolar que ofertamos ou beneficiarte das nosas Actividades Extraescolares. Se estas interesad@ so tes que visitar o noso blogue e entrar no apartado ISCRÍBETE, aquí poderas atopar toda a información e documentación necesarias.
 

COLABORA CUN PROXECTO SERIO E NECESARIO PARA A COMUNIDADE EDUCATIVA DE VEDRA!!!

Cal é o principal obxectivo da ANPA?

Contribuír, na medida das nosas responsabilidades, á formación do alumnado e ao bo funcionamento do C.P.I. Plurilingüe de Vedra. Nesta tarefa, cada nai e cada pai somos imprescindibles.

Qué fai?

• Vela polo bo estado das infraestruturas educativas, e o funcionamento axeitado dos servizos complementarios (comedor, transporte…).
• Presta apoio ao alumnado, e as súas familias, en todo o relacionado coas necesidades educativas e coa asistencia ao centro (seguro escolar, Banco de Libros, chándal…).
• Tenta chegar a convenios e acordos para lograr, para @s nos@s soci@s, un mellor prezo en materiais de uso común do alumnado, dende material escolar ata, por exemplo, gafas ou outros servizos e produtos. 
• Mantén un blogue de comunicación das actividades da ANPA, e aporta materiais para a reflexión, o debate e a formación. 
• Defende os intereses de nais e pais no Consello Escolar. 
• Colabora nas campañas educativas do Centro (excursións, festivais, xornadas formativas…).

Qué fixemos ata o de agora?

• Colaboración con causas solidarias: Fundación Andrea, Todos con Xose Manuel....
• Xestión de material escolar para familias en risco de exclusión social, en colaboración coa Fundación La Caixa. 
• Banco de Libros de texto. 
• Obradoiros varios, así como actuacións para os festivales de Nadal. 
• Xornada arredor dos problemas educativos, encontros da Comunidade Educativa, nos que participan diversos profesionais. 
• Colaboración coas Xornadas Pedagóxicas, evento de carácter internacional que se leva a cabo no noso colexio. 
• Outros proxectos de economía local arredor da comunidade educativa, como o chándal de Vedra ou outros convenios que estamos a levar a cabo para aforrar cartos @s nos@s soci@s. 
• Facemos moitas outras cousas. Se queres saber máis non te olvides de visitar o noso blogue.

OS AXÓUXERES

Este fin de semana chega a Vedra o novo espectáculo da Rede de Dinamización Lingüística, Os Axóuxeres. Trátase dunha actividade orientada para nenas e nenos de ata 6 anos que gozarán dun escenario cheo de música, xogos e palabras.

Terá lugar no Museo Paz Camps de San Fins de Sales o sábado 26 de setembro ás 12:00 horas.

A entrada é de balde, pero con reserva previa ata completar aforo. O prazo de reserva comezou este luns e podedes facela chamando ó 697 363 089 de luns a venres de 10:00 a 13:00 horas.

ANIMÁDEVOS!!!

ACTIVIDADES CULTURAIS E DEPORTIVAS 2015-16

Como todos os anos o Concello de Vedra oferta o seu programa de actividades culturais e deportivas para esta nova tempada. Dende a ANPA A Bóca estamos totalmente comprometidos e concienciados ca cultura e o deporte, e máis aínda en idade escolar, e gustaríanos animarvos a que tanto nen@s como nais e pais participedes en ditas actividades.

O prazo de inscrición remata o día 30 deste mes de setembro.

Para as actividades culturais xa está o prazo aberto dende o día 10 deste mes e podedes formalizar a inscrición poñéndovos en contacto:

- A través do enderezo electrónico: cultura@concellodevedra.com.

- A través do teléfono 981 814 691.

- Ou no propio departamento de cultura.

Para inscribirse nas actividades deportivas teredes que agardar ata o día 22 de setembro e poderedes facelo no pavillón municipal.

 

Para máis información podedes revisar o programa completo no seguinte enlace:

PROGRAMA DE ACTIVIDADES CULTURAIS E DEPORTIVAS 2015-2016

OS BOLECHAS EN VEDRA

Este sábado 18 ás 19:00 horas no Museo Paz Camps, Os Bolechas presentan unha actividade de dinamización lingüística chamada "Os Bolechas na máquina do tempo: unha viaxe a través do tempo cun científico tiruleco". Esta actividade enmárcase dentro da nova xira do programa de dinamización lingüística falaRedes.

Animádevos a asistir!

Para máis información pinchade no seguinte enlace: Máquina do tempo.

CHARLA/COLOQUIO: APLICACIÓN DA LOMCE NA ESO

Como xa sabedes, hoxe estase a realizar a Proba de Avaliación Individual de Terceiro Curso de Ensino Primario imposta pola LOMCE. No senso deste tipo de probas e para máis información dos pais e nais que o desexen a CONFAPA-GALICIA está a levar a cabo unha serie de charlas informativas. Nesta ocasión convocannos a todos os pais e nais para falar do CURRICULO NA SECUNDARIA E BACHARELATO (itinerarios en 3º da ESO, Reválida de 4º da ESO e 2º de Bacharelato…). Actuarán como relatores Helena Gómez Vecino, presidenta de CONFAPA-GALICIA, e Jose M. Fuentes Fariña, en representación da Plataforma en Defensa do Ensino Público. O que pretenden é facer desta convocatoria un espazo informativo e participativo.

DÍA:   SÁBADO 30 DE MAIO.
HORA:   10:30 horas (duración aprox. de 2 horas).
LUGAR:   Sede da Federación Provincial, Rúa Orzán nº 21 da Coruña.

GRANDE SEMINARIO O PASADO FIN DE SEMANA

Este pasado fin de semana (20-21 de febreiro) tivo lugar en Vedra o VI Seminario-Obradoiro Internacional de Avaliación de Materiais Didácticos titulado "A educación e os materiais didácticos en Finlandia: ¿Qué podemos aprender?".

O venres 20 pola tarde tivo lugar na Casa da Terceira Idade a inauguración do seminario á que asistiron Jesús Rodríguez (Profesor da USC e organizador do seminario), Juan Viaño (Reitor da USC), Carlos Martínez (Alcalde de Vedra), José Viaño (Director do CPI de Vedra) e Xavier Rodríguez (Presidente da ANPA A Boca). O curso douse por inaugurado ca presentación da charla-coloquio de Tom Wikman, profesor finlandés que compartiu as suas experiencias con todos nós. Esta primeira xornada foi todo un éxito e vímonos desbordados coa asistencia de máis de 60 persoas, as que puideron disfrutar duns pinchos ofrecidos pola ANPA despois da charla.

A segunda xornada que transcorreu na mañá e tarde do sábado no CPI de Vedra, tivo tamén unha gran afluencia cun total de 42 inscritos ós obradoiros, impartidos por grandes profesionais da educación de lugares tan dispares como Valencia, Brasil, Portugal, Argelia e Finlandia. O ambiente de traballo foi moi agradable e productivo e todos os presentes puideron disfrutar duns merecidos descansos a media mañá e media tarde cuns pinchos ofrecidos pola ANPA.

Dende a ANPA gustarianos destacar a gran labor de todos os organizadores e colaboradores e gustarianos darlles as gracias a todas e todos os asistentes ó seminario. Destacar tamén o gran ambiente de traballo e compañeirismo que se respirou eses dous días e esperamos que se volva a repetir o ano que ven.

MOITAS GRACIAS A TOD@S!!!

"Podedes ver as fotos do encontro pinchando aquí."

INVITACIÓN VI SEMINARIO-OBRADOIRO INTERNACIONAL DE AVALIACIÓN DE MATERIAIS DIDÁCTICO

¿Sabes o que é o ciberbullying? ¿Sabes se o teu fillo ou filla o está sufrindo? ¿Gustariache aprender a detectalo e a remedialo? ¿Consideras que os xoguetes e videoxogos ós que xogan teus fillos non son os idóneos? Estas inquedanzas e moitas máis son as que se van tratar no VI Seminario-Obradoiro Internacional de Avaliación de Materiais Didácticos que se celebrará este venres 20 e sábado 21 en Vedra e ó que todos os pais e nais interesados estades invitados a asistir de forma totalmente gratuita.

A sexta edición deste seminario internacional organizado entre outros pola ANPA “A Boca”, o CPI de Vedra e a Universidade de Santiago de Compostela, e no que colabora o Concello, celébrase aquí en Vedra por primeira vez. O seminario-obradoiro impartirase preferencialmente en castelán, pero tamén en galego-portugués e inglés.

Para abrir boca e as nosas mentes críticas, o venres pola tarde no Centro da Terceira Idade de Vedra teremos unha interesante conferencia do profesor Tom Wikman de Finlandia. Nesta charla compartirá todas as suas experiencias e daranos unha perspectiva dun dos mellores sistemas educativos do mundo. Unha vez rematada a mesa redonda na que poderedes facer todas as preguntas que vos xurdan, realizarase unha ruta lúdico-cultural polos furanchos da zona á que podedes asistir previo pago e inscrición esa mesma tarde antes da conferencia.

O sábado teremos uns obradoiros no CPI de Vedra que tocan temas tan interesantes como o ciberbullying, xoguetes, videoxogos, material didáctico, etc… no que aprenderedes como detectar posibles problemas e como atallalos. Poderedes realizar un obradoiro pola mañá e outro pola tarde, cos correspondentes descansos para o café para que non se faga longo.

Como xa dixemos, calquera pai ou nai que queira asistir pode facelo de forma gratuita á conferencia do venres e ós obradoiros do sábado. Debido á gratuidade desta oferta, non se vos entregará ningún certificado de asistencia. Para máis información pincha aquí.

A directiva da ANPA “A Boca” do CPI Plurilingüe de Vedra.