Resposta da Presidenta da CONFAPA

Como sabedes, no mes de outubro pasado enviámoslle á presidenta da CONFAPA unha copia do acordo asembleario desta ANPA, no que se manifestaba a posición da mesma ante o uso dos libros de texto e os recortes no ensino público. Esta é a resposta de Helena Gómez, presidenta da CONFAPA.

  Prezado compañeiro:

  Na Federación Provincial de Anpas á que pertencedes, compartimos absolutamente as vosas demandas, que son as nosas. Tempo levamos demandando o servizo de préstamo de libros de texto que nunca debeu desaparecer. En moitas Anpas vímonos obrigados este curso a formar "bancos de libros", na que as familias deixan os libros de cursos pasados e recollen os que lles serven para o novo curso. Hai que dicir que en xuño nada se sabía da suba do IVE e agradecer á Federación de Libreiros (polo menos na Coruña cidade e noutras comarcas) de non aplicar dito IVE ate o mes de outubro. Se mirades na web da Federación veredes isto reflectido.

Asemade, esta nova xunta directiva da Federación comparte as demandas do profesorado: somos conscientes de que a súa situación laboral repercute enormemente na calidade do ensino e no tempo das titorías  -tan importantes para nós como nais e pais- . A nosa solidariedade con eles está baseada en considerarnos todos parte da comunidade educativa. Na manifestación que seguíu á xornada de folga de nais e pais do ensino público o día 18 de outubro, estaba presente parte do profesorado.

Coa finalidade de dar a maior repercusión ás demandas da túa Anpa que, reitero, son as nosas, vou ler  -co teu permiso-  a vosa carta na vindeira xuntanza da ALIANZA SOCIAL GALEGA, recentemente constituída, e da que forman parte xunto con outras cáseque sesenta organizacións CONFAPA-GALICIA  e a meirande parte dos sindicatos aos que vos dirixides. (Podes consultar en internet).

Moitas grazas polo voso labor e estade certos de que tedes o noso apoio incondicional. Confiemos en que a unión de todas as Anpas faga posible un cambio na política educativa: niso estamos empecinados.

Recibe unha aperta fraternal extensiva a todos os membros da Anpa A Boca.

   Helena Gómez Vecino.

Presidenta da Federación Provincial de Centros Públicos de A Coruña.

Presidenta de CONFAPA-GALICIA.